Superman ဇာတ်ကောင်၏ နာမည်ကျော် အတွင်းခံဘောင်းဘီကို မဝတ်ရသည့်အတွက် မိမိ စိတ်သက်သာရာ ရမိကြောင်း မင်းသား ဟင်နရီ ကာဗီးလ်က အရွှမ်းဖောက် ပြောကြားခဲ့သည်။ ကာဗီးလ်သည် Superman: Man of Steelဇာတ်ကားတွင် ပါဝင် သရုပ်ဆောင်ထားသူ ဖြစ်သည်။ ယခုဇာတ်ကားသစ်တွင် Superman၏ ဝတ်စုံ၌ အပြောင်းအလဲများစွာ ဖြစ်ပေါ်ခဲ့ပြီး ယခင်အပြာမှ အနက်ရောင်ဘက် ကူးပြောင်း ဒီဇိုင်းထုတ်ထားသလို ဘောင်းဘီရှည်ပေါ် ထပ်ဝတ်ထားသည့် နာမည်ကျော် အတွင်းခံဘောင်းဘီ အနီရောင်လည်း ပါမလာတော့ချေ။ ကာဗီးလ်က အဆိုပါ အပြောင်းအလဲကို ကြိုဆိုကြောင်း၊ သို့မဟုတ်လျှင် ပရိသတ်များက မိမိကို နောက်ပြောင်နေကြမည်ကို စိုးရိမ်မိကြောင်း ပြောကြားခဲ့သည်။
The Sunနှင့် အင်တာဗျူးတွင် ကာဗီးလ်က "ခုခေတ် ချာတိတ်တွေက တော်တော်လေး အမြင်ကျယ် ဖွံ့ဖြိုးလာပြီ။ ပြီးတော့ အရင်ခေတ်က Supermanဇာတ်ရုပ်ရဲ့ လွှမ်းမိုးမှုကိုလည်း သူတို့ နားလည်မှာ မဟုတ်ဘူး။ ဒီတော့ Supermanက ဘယ့်နှယ်ကြောင့် အတွင်းခံ ဘောင်းဘီကြီး အပြင်ထုတ်ဝတ်ထားလဲ မသိဘူးလို့ သူတို့ မေးကြလိမ့်မယ်။ ကျွန်တော် ဘယ်လို ဖြေရမလဲ"ဟု ဆိုသည်။ အသက်(၃၀)အရွယ် မင်းသားက ယခုဝတ်စုံသစ်သည်လည်း မိမိအတွက် ဂွကျပ်ပြီး နေရာထိုင်ရ ခက်ခဲ့ကြောင်း ဖွင့်ဟသွားသည်။
၎င်းက "တော်တော်ကျပ်တဲ့ ဝတ်စုံဗျ။ အခက်ဆုံး ကိစ္စက အိမ်သာသွားတဲ့အခါမှာပဲ။ အပေါ့သွားဖို့တင် အချိန်တော်တော်ယူပြီး အဖွင့်အပိတ် လုပ်ရတဲ့ ဝတ်စုံပဲ။ ကျွန်တော် တော်တော်လေး စိတ်ရှည်ရှည် စောင့်ရတယ်"ဟု ရယ်ရယ်မောမော ပြောကြားခဲ့သည်။ Superman: Man of Steelကို အမေရိကန်နှင့် ကနေဒါတို့တွင် ယနေ့ စတင် ရုံတင် ပြသမည်ဖြစ်သည်။
- 
- See more at: http://4wadi.blogspot.com/2013/06/test_8.html#sthash.x5kXvZwl.dpuf
0 comments:
Post a Comment